Երեխաները ծնողների կյանքի շարունակությունն են: Նրանք, անշուշտ, իրենց վրա են կենտրոնացնում ծնողների ամբողջ ուշադրությունը և ցանկացած հարց, ինչը վերաբերվում է փոքրիկներին, ծնողների կողմից ընկալվում է որպես հույժ կարևոր, հատկապես, երբ խոսքը հիվադությունների մասին է: Բնականաբար, որոշ հիվանդությունների զարգացումը շատ տարածված չէ, բայց ավելի լավ է իմանալ նրանց մասին, քան մտածել, թե ինչ է տեղի ունենում սիրելի փոքրիկի հետ:
Երեխաների հիվանդություններից մեկը, որը հնարավոր չէ չնկատել՝ հեմանգիոման է: Այս հիվանդությունը ի հայտ է գալիս մաշկի վրա, այդ իսկ պատճառով երեխայի խնամքի ընթացքում անհնար է այն չտեսնել:
Ի՞նչ է հեմանգիոման
Առաջին հարցը, որ մտահոգում է ծնողներին. ի՞նչ է հեմանգիոման: Հեմանգիոման բարորակ նորագոյացություն է, որը կազմված է լայնացած մազանոթների խիտ կուտակումներից:
Հեմանգիոմաները բավական հաճախ են հանդիպում: Ընդ որում, աղջիկները երկու անգամ ավելի հաճախ են հիվանդանում, քան տղաները: Հեմանգիոմաները նորածինների մոտ առավել հաճախ հանդիպող նորագոյացություններ են:
Հեմանգիոմաները կարող են լինել ինչպես մաշկում, այնպես էլ ներքին օրգաններում: Դրանք առավել հաճախ տեղակայվում են դեմքին, գլխին և կրծքավանդակի վերին հատվածներում: Կարող են լինել նաև ծայրանդամներին:
Մաշկի մակերեսային շերտերում տեղակայվելիս նրանք սովորաբար երևում են փոքր, կարմիր քերծվածքների կամ բշտիկների տեսքով: Աճին զուգընթաց, նրանք դառնում են գորշ - կարմիր գույնի: Մաշկի հեմանգիոմաները երբեմն կոչվում են մորենման հեմանգիոմաներ՝ բնորոշ տեսքի պատճառով: Մաշկի առավել խորը շերտերում տեղակայվելիս դրանք անգույն են լինում և արտահայտվում են հիմնականում, որպես մաշկի արտափքված գոյացություն:
Նորածինների հեմանգիոմաները բնորոշվում են արագ աճով, որին հաճախ հաջորդում է դրանց հետզարգացումը: Հեմանգիոմաների առավել ակտիվ աճը դիտվում է երեխայի 4-6 ամսական հասակում, որից հետո դիտվում է աճի համեմատական կանգ: 5-7 տարեկան հասակում 50% դեպքերում հեմանգիոմաները ամբողջությամբ անհետանում են:
Որպես կանոն, հեմանգիոմաները իրենց հանդեպ գերուշադրություն չեն պահանջում, սակայն դրանք պետք է վերահսկվեն:
Հեմանգիոմայի վերահսկողությունը
Եթե նորագոյացության աճը համամասնական է երեխայի աճին, ապա այն ավտանգ է: Նման գոյացությունը միայն կոսմետիկ թերություն է, որը մեծ հավանականությամբ ինքնուրույն վերանալու է: Եթե հեմանգիոման սկսում է արագորեն մեծանալ, փոխում է իր գույնը, խոցոտվում է, ապա անհապաղ պետք է այցելել բժշկի: Բացի այդ, հեմանգիոման պետք է հեռացվի, եթե այն մշտապես վնասվում է, քանի որ դա կարող է արյունահոսության պատճառ հանդիսանալ: Հեռացման են ենթակա նաև տեսողությանը, լսողությանը կամ նորմալ կենսագործունեությանը խանգարող հեմանգիոմաները:
Կլինիկապես արտահայտված հեմանգիոմաների բուժման տարբերակները ներառում են դեղորայքային կոնսերվատիվ բուժումը, լազերային վիրաբուժությունը և վիրաբուժական եղանակով հեռացումը:
• Դեղորայքային կոնսերվատիվ բուժում
• Լազերային վիրաբուժություն
• Վիրաբուժական հեռացում
Մանրամասն տեղեկությունների համար կարող եք կապվել մեզ հետ (010) 20.59.90 հեռախոսահամարով:
