Կզակի դեֆեկտների շտկում

   Գոյություն ունեն  գեղեցկության տարբեր չափանիշներ։ Սովորաբար գեղեցիկ են համարվում արտահայտիչ աչքերը, ուղիղ քիթը, հաստ շրթունքները և բարձր ճակատը: Բայց հաճախ այնպես է լինում, որ նման հատկանիշներով դեմքն անշուք է թվում: Նման դեպքերում դեմքը զուրկ է լինում համաչափությունից, արտահայտիչ գծերից:

   Մենտոպլաստիկան պլաստիկ վիրահատություն է, որը թույլ է տալիս շտկել ստորին ծնոտի թերությունները։  Իսկ գենիոպլաստիկան կզակի պլաստիկ վիրահատությունն է: Այս վիրահատական միջամտությունների հիմնական նպատակն էսթետիկ դեֆեկտի նվազեցումը կամ վերացումն է: Այսօր մենք կքննարկենք կզակի չափերի մեծացմանն (augmentation genioplasty) ուղղված միջամտությունները:
   Ինչպես այլ վիրահատական միջամտությունները, կզակը մեծացնող (աուգմենտացիոն) գենիոպլաստիկան նույնպես ունի անցկացման ցուցումներ, որոնք որոշվում են բժշկի և պացիենտի համատեղ քննարկման արդյունքում: Այս վիրահատությունը լավագույն մեթոդն է այն մարդկանց համար, որոնք ունեն կզակի դեֆեկտ, որը կարող է լինել շատ փոքր կամ թեքված:

  Աուգմենտացիոն գենիոպլաստիկան կարող է իրականացվել տարբեր մեթոդներով: Նրանցից յուրաքանչյուրը որոշվում է պացիենտի մանրակրկիտ ուսումնասիրությունից հետո և համապատասխանեցվում է պացիենտի ցանկություններին: Կզակի մեծացումը կարող է իրականացվել իմպլանտների միջոցով: Իմպլանտացիոն մեթոդիկայի էությունը բիոհամատեղելի իմպլանտների տեղադրումն է պացիենտի թերզարգացած կզակոսրի մակերեսին՝ փափուկ հյուսվածքների տակ: Իմպլանտների ընտրությունը կատարվում է դեմքի կմախքի կառուցվածքին համապատասխան:

Աուգմենտացիոն գենիոպլաստիկայի մեկ այլ մեթոդներից է լիպոֆիլինգը, որի ժամանակ կզակի մեծացումն իրականացվում է պացիենտի սեփական ճարպի միջոցով:

 Կզակի չափերի մեծացմանն ուղղված վիրահատական մյուս մեթոդներից է «սահող» կամ ոսկրային գենիոպլաստիկան: Ոսկրային տեխնիկայի էությունը կզակոսկրի մի հատվածի հատումն է և դրա տեղաշարժը դեպի առաջ:

Մանրամասն տեղեկությունների համար կարող եք կապ հաստատել մեզ հետ  (010) 20.59.90 հեռախոսահամարով։