Մաշկի խնամքը ցրտահարության դեպքում

Սառնամանիքների ի հայտ գալով մենք շատ  տաք հագուստ ենք կրում՝ պաշտպանելով մեր մարմինը, մինչդեռ դեմքը և, շատ դեպքերում, ձեռքերը մնում են միանգամայն անպաշտպան: Ամերիկացի գիտնականների կողմից հաստատվել է, որ մեր մաշկը շատ ավելի արագ է  ծերանում  ձմռանը և աշնան ամիսներին, քան ամռանը: Հայտնի է, որ սառչելիս մաշկի բջիջներում ձևավորվում են սառույցի միկրոբյուրեղներ, որոնք վնասում են բջիջները: Այդ միկրոբյուրեղների ձևավորումը կարող է առաջացնել տարբեր խնդիրներ`մակերեսային գրգռվածությունից մինչև ճարպային հյուսվածքի խորը բորբոքում: Այդ դեպքում  մաշկում առաջանում են միկրոճաքեր, որոնք երկար ժամանակ չեն ապաքինվում:

Արյան անոթների նեղացումը

Ցրտի նկատմամբ մաշկի առաջին արձագանքներից մեկը նաև մակերեսային արյան անոթների նեղացումն է, ինչը պաշտպանում է օրգանիզմը ջերմության ավելորդ կորստից: Բայց միևնույն ժամանակ նույն անոթները ժամանակ առ ժամանակ լայնանում են, որպեսզի պաշտպանեն մաշկը գերսառեցումից: Այսինքն՝ ցածր ջերմաստիճանների պայմաններում մաշկի անոթները պարբերաբար նեղանում և լայնանում են: Անոթային նման ռեակցիաների կարգավորումն իրականացվում է և՛ նյարդային համակարգի, և՛ հատուկ բիոակտիվ մոլեկուլների՝ ցիտոկինների միջոցով:

Անոթների հաճախակի նեղացման և լայնացման դեպքում անոթային ռեակցաների կարգավորումը պետք է արագ և արդյունավետ լինի, ինչը միշտ չէ պատահում: Այդ պատճառով էլ, որոշ մարդկանց մոտ ցրտին մաշկը հաճելի վարդագույն երանգ է ստանում, իսկ այլ մարդկանց մոտ մաշկը կարմրում է կամ կապտավուն երանգ է ստանում, մաշկի մակերեսին առաջանում են անոթային աստղիկներ և պիգմենտային բծեր:

Անոթների լայնացման եղանակները

Բացի այդ, մաշկի համար վատ ազդեցություն են ունենում նաև ջերմաստիճանի կտրուկ տատանումները (երբ մենք դրսից մուտք ենք գործում տաք սենյակ), որոնք զգալիորեն նվազեցնում են մաշկում էլաստինի, կոլագենի և հիալուրոնաթթվի առաջացումը: Արագ վերականգնելու ունակությունից զրկված մաշկը սկսում է կարմրել, չորանալ, թեփոտվել, ինչի արդյունքում  էլ զարգանում է մակերեսային բորբոքում: 

Ցավոք, չկան այնպիսի քսուքներ, որոնք կարող են վերականգնել մաշկի անոթային ռեակցիաների կարգավորման պրոցեսները, բայց հնարավոր է մարզել մաշկի անոթները: Հայտնի է, որ կոփված մարդկանց մոտ անոթների նեղացումն ու լայնացումը տեղի են ունենում ավելի արագ, ինչը նշանակում է, որ մաշկի ցրտային վնասման ռիսկը նվազում է: Անոթների կոփման ամենաարդյունավետ միջոցը կոնտրաստային լոգանքներն են. դեմքը անհրաժեշտ է լվանալ զով և քիչ տաք ջրով՝ աստիճանաբար ավելացնելով դրանց ջերմաստիճանների տարբերությունը:

Բացի կոնտրաստային լոգանքներից, մաշկը հնարավոր է պաշտպանել  ամենօրյա խնամքի համար նախատեսված քսուքների ճիշտ կիրառման միջոցով:

Մաշկի խնամքը ցրտահարման դեպքում

Ցրտահարման հավանականությունը մեծացնում է մաշկի խոնավության բարձրացման դեպքում: Ահա թե ինչու նախքան ցրտին դուրս գալը խորհուրդ չի տրվում օգտագործել ինտենսիվ խոնավեցնող քսուքներ: Խոնավեցնող կամ էմուլսիոն (ջրա-յուղային խառնուրդ) քսուքներ կիրառելիս, նրանցից առաջիկա 30-40 րոպեների ընթացքում գոլորշանում է ջուրը, ինչը նպաստում է մաշկի սառեցմանը: Հետևաբար՝ նման քսուքները պետք է կիրառել դուրս գալուց, ամենաքիչը,1 ժամ առաջ: Իսկ մաշկի չորությունից և թեփոտումից պաշտպանվելու լավագույն տարբերակը դրա խոնավեցումն է երեկոյան ժամերին, անմիջապես լոգանքից հետո: Կարելի է կիրառել ցանկացած խոնավացնող քսուքներ, որոնք չեն գրգռում մաշկը:

Բավականին արդյունավետ են հիալուրոնաթթու, բնական յուղեր, սիլիկոններ, փոքր քանակությամբ գլիցերին կամ սորբիտ պարունակող քսուքները: Մաշկը խոնավացնելու համար կարելի է կիրառել նաև մաքուր կոսմետիկ յուղեր `ավոկադոյի, ժոժոբայի, կոկոսի, խաղողի կորիզների և այլն:

  

Մաշկի խնամքի միջոցներ

Այնպիսի քսուքները, որոնցում հիմնական բաղադրիչը վազելինն է, հարմար են միայն շատ չոր մաշկ ունեցող մարդկանց և մաշկի հիվանդություններով (էկզեմա, փսորիազ) տառապող մարդկանց համար: Այս քսուքները խորհուրդ չեն տրվում կիրառել նախքան դուրս գալը, քանի որ վազելինը նպաստում է մաշկում խոնավության հավելյալ կուտակմանը, ինչը մեծացնում է ցրտահարության վտանգը:

 

Ձմռանը չոր մաշկի հիմնական պատճառը նաև տանը ոչ բավարար խոնավությունն է, քանի որ տաքացնող սարքերը չորացնում են օդը: Եթե  բնակարանի օդն իսկապես չոր է, ապա, բացի խոնավեցնող քսուքների կիրառումից, անհրաժեշտ է նաև խոնավացնել բնակարանի օդը՝ տեղադրելով հատուկ խոնավացուցիչներ կամ տարաներ ջրով տաքացնող մարտկոցներին:

Մանրամասն տեղեկություն ստանալու համար  կարող եք կապվել մեզ հետ (010) 20.59.90 հեռախոսահամարով: